காலையோ, மாலையோ, வேலையின் ஆரம்பமோ, முடிவோ நண்பர் குழாம் சந்திப்பது ஒரு தேநீர்க் கடையில்தான். இப்படித்தான் தேயிலை உலகெங்கிலும் உள்ள பல கலாச்சாரங்களின் தவிர்க்க முடியாத அம்சமாக மாறிவிட்டது. கிழக்கத்திய நாடுகளில் தேநீர் அதன் மருத்துவ பயன்பாடுகளுக்காக மதிக்கப்படுகிறது. கி.மு. 2737 இல் சீனாவின் பேரரசர் ஷென் நங், கேமல்லியா சினென்சிஸ் செடியின் சில இலைகளை கொதிக்கும் நீரில் போட்டு கிளறி உலகின் முதல் தேநீரை அருந்தினார்.

நமது நவீன உலகில் சீனா, ஜப்பான், இந்தியா, இலங்கை, கொரியா, தைவான், மற்றும் துருக்கி போன்ற நாடுகளில் தேநீர் உடல் நலத்தை வலிமைப்படுத்தும் பானமாக கருதப்படுகிறது. தேயிலையில் பல வகை உண்டென்றாலும் ஆடம்பர பிராண்டுகள் சில விலை உயர்ந்த தேநீர்களை தேயிலை ஆர்வலர்களுக்காக உருவாக்கியுள்ளன.

1. டா-ஹாங் பாவோ தேநீர், சீனா

ஒரு கிலோவுக்கு சுமார் 9 கோடி ரூபாய் மதிப்புள்ள டா-ஹாங் பாவ் தேயிலை, சீனாவின் புஜியான் மாகாணத்தின் வுயி மலைகளில் விளையும் உலகின் மிக விலையுயர்ந்த தேயிலையாகும். மேலும் அதன் அரிதான தன்மையின் பொருட்டு அதை தேசிய பொக்கிஷமாக அறிவித்திருக்கிறார்கள்.

முன்னாள் அமெரிக்க அதிபர் நிக்சனின் சீனப் பயணத்தின் போது, சீன மக்கள் குடியரசின் நிறுவனர் மாசேதுங் இரு நாடுகளுக்கும் இடையே அமைதி மற்றும் நட்புறவைக் குறிக்கும் வகையில் நிக்சனுக்கு 200 கிராம் டா-ஹாங் பாவோ தேயிலையை பரிசாக வழங்கினார்.

சிறந்த டா-ஹாங் பாவோ தேநீர் தாய் மரங்களிலிருந்து வருகிறது. அத்தகைய மரங்கள் ஆறு மட்டுமே பூமியில் உள்ளன. தாய் செடிகளில் இருந்து சுமார் 20 கிராம் டா-ஹாங் பாவோ தேயிலை 2005 இல் 22.5 இலட்சம் ரூபாய்க்கு விற்கப்பட்டது. இது தேநீர் வரலாற்றில் அதிக ஏல சாதனையாக அமைந்தது.

2. பாண்டா சாணம் தேநீர், சீனா

வித்தியாசமாக, பாண்டா சாணம் தேயிலை சாகுபடி பாண்டா கரடியின் சாணத்தை உரமாக பயன்படுத்துகிறது. தென்மேற்கு சீனாவில் தொழில்முனைவோரான ஆன் யான்ஷி என்பவரால் இந்த தேயிலை முதன்முதலில் பயிரிடப்பட்டது. அவர் அருகிலுள்ள பாண்டா கரடி இனப்பெருக்க மையங்களில் இருந்து பாண்டா சாணத்தை கரிம உரமாக பயன்படுத்தத் தொடங்கினார். இந்த விசித்திரமான தேநீரின் முதல் தொகுப்பை 50 கிராமுக்கு சுமார் 2,61,000 ரூபாய்க்கு விற்றார்.

அதிக ஆக்ஸிஜனேற்ற உள்ளடக்கம் கொண்ட பாண்டா சாணம் எண்ணற்ற ஆரோக்கிய நன்மைகளைக் கொண்டிருப்பதாக நம்பப்படுகிறது. பாண்டா சாணம் தேநீர் ஒரு கிலோவிற்கு சுமார் 52 இலட்சம் ரூபாய்க்கு விற்கப்படுகிறது.

3. மஞ்சள் தங்க தேநீர் மொட்டுகள், சிங்கப்பூர்

ஆடம்பரமான மற்றும் அரிதான, மஞ்சள் தங்க தேயிலை மொட்டுகள் வருடத்திற்கு ஒரு முறை தங்க கத்தரிகள் பயன்படுத்தி அறுவடை செய்யப்பட்டு பின்னர் வெயிலில் உலர்த்தப்படுகின்றன. தேயிலை இலைகள் பின்னர் உண்ணக்கூடிய 24-காரட் தங்க செதில்களால் தெளிக்கப்படுகின்றன. சீன பேரரசர்களின் தேநீர் என்று அழைக்கப்படும் இதன் ஒரு கிலோ தேயிலை இலைகளின் விலை சுமார் 5,83,000 ரூபாய் ஆகும்.

அதன் பெயருக்கு ஏற்றவாறு, இது ஒரு தனித்துவமான உலோகம் மற்றும் மலரின் சுவை கொண்டது. மற்றும் மனிதர்களின் வயதாவதன் தன்மையை தடுப்பது மற்றும் பிற ஆரோக்கிய நன்மைகளுக்காக அறியப்படுகிறது. TWG தேயிலை நிறுவனத்தால் தற்போது சிங்கப்பூரில் மட்டுமே விற்பனை செய்யப்படுகிறது.

4. சில்வர் டிப்ஸ் இம்பீரியல் டீ, டார்ஜிலிங், இந்தியா

இது பௌர்ணமி இரவுகளில் அனுபவம் வாய்ந்தவர்களால் பறிக்கப்படும் தேயிலை. இது டார்ஜிலிங்கின் சாய்வான மலைகளில் உள்ள மக்கைபரி தேயிலை தோட்டத்தில் அறுவடை செய்யப்படும் ஒரு வகை ஊலாங் தேயிலை (Oolong Tea) ஆகும். தேநீர் சிறப்பு மொட்டுகளிலிருந்து வருகிறது. அவை வெள்ளி ஊசிகள் போல தோற்றமளிப்பதோடு பழ வாசனையைக் கொண்டுள்ளன. இது மாம்பழம் மற்றும் ஃபிராங்கிபனியின் வாசனையுடன் சிக்கலான சுவை கொண்டது.

2014 ஆம் ஆண்டு ஏலத்தில், ஒரு கிலோவிற்கு 1,38,000 ரூபாய் என விற்கப்பட்டது, இது இந்தியாவின் மிக விலையுயர்ந்த தேநீர் ஆகும்.

5. கியோகுரோ தேநீர், ஜப்பான்

ஜப்பானின் மிக உயர்ந்த தரமுள்ள பச்சை தேயிலைகளில் ஒன்றாகக் கருதப்படும் கியோகுரோ ஜப்பானிய மொழியில் 'முத்து பனி' அல்லது 'ஜேட் டியூ' என அழைக்கப்படுகிறது. இது உஜி மாவட்டத்தில் பயிரிடப்படுகிறது. இந்த தேயிலையை அறுவடை செய்யும் செயல்முறையானது சிறந்த தேயிலை இலைகளை பறிப்பதற்கு நான்கு வாரங்களுக்கு வைக்கோல் விரிப்பின் நிழலின் கீழ் வளர்க்க வேண்டும். இந்த செயல்முறை தாவரமானது எல்-தியானைன் அமினோ அமிலத்தை தக்கவைக்க உதவுகிறது. இது தேநீரில் உமாமி அல்லது சற்றே காரமான சுவையை அதிகரிக்கிறது.

கியோகுரோ தேநீர் முதன்முதலில் 1835 ஆம் ஆண்டில் கஹெய் யமமோட்டோ VI என்பவரால் கண்டுபிடிக்கப்பட்டது. ஒரு கிலோ கியோகுரோ தேநீர் தோராயமாக 48,600 ரூபாய் ஆகும்.

6. பியூர் தேநீர், தென் மேற்கு சீனா

இந்த தேயிலை முதலில் 18 ஆம் நூற்றாண்டில் கண்டுபிடிக்கப்பட்டது. Pu'erh தேநீர் ஒரு கிலோகிராம் தோராயமாக 7,50,000 ரூபாய் விலையில் விற்கப்படுகிறது. இந்த தேயிலை மிகவும் சுத்திகரிக்கப்பட்ட மற்றும் மிகவும் விலையுயர்ந்த தேயிலைகளில் ஒன்றாக கருதப்படுகிறது.

Pu'erh தேநீர் பொதுவாக டீ கேக் வடிவத்தில் விற்கப்படுகிறது. இது எடை மேலாண்மை, கொழுப்பைக் குறைத்தல் மற்றும் மேம்படுத்தப்பட்ட குடல் ஆரோக்கியம் உள்ளிட்ட அதன் ஆரோக்கிய நன்மைகளை அனுபவிக்க காய்ச்சலாம்.

இந்த தேயிலை தென்மேற்கு சீனாவின் யுனான் மாகாணத்தில் பெரும்பாலும் பயிரிடப்படுகிறது. சில மரங்கள் ஆயிரக்கணக்கான ஆண்டுகள் பழமையானவை. நுண்ணுயிர் நொதித்தல் செயல்முறை, தேயிலை இலைகளை புளிக்க பயன்படுத்தப்படுகிறது. புராணக் கதைகளின் படி, சீனாவின் வரலாற்றில் இந்த தேநீர் காரணமாக பல போர்கள் நடந்தன.

7. டைகுவான்யின் தேநீர், சீனா

உலகில் மிகவும் மதிக்கப்படும் தேநீர் வகைகளில் ஒன்றான டைகுவான்யின் தேநீர் என்பது பௌத்த தெய்வத்தின் நினைவாக பெயரிடப்பட்ட ஊலாங் தேநீர் வகையாகும். குவான் யின், கருணையின் இரும்பு தெய்வம் என்றும் அழைக்கப்படுகிறது.

இந்த தேயிலை இலைகள் ஒரு தனித்துவமான சுவை மற்றும் மலர் வாசனை கொடுக்கிறது. தேயிலை புஜியான் மாகாணத்தின் மிக உயரமான பகுதிகளில் வளர்க்கப்படுகிறது. இதன் இலைகள் மிருதுவான மற்றும் பிரகாசமான பொன்னிறமாகும் வரை வெயிலில் உலர்த்தப்படுகின்றன.

இந்த தேநீரின் விலை அது அரிதாக கிடைக்கும் ஒன்றாக இருப்பதால் தொடர்ந்து அதிகரித்து வருகிறது. ஒரு கிலோ 2,24,000 ரூபாய்க்கு விற்கப்படுகிறது.

8. விண்டேஜ் நர்சிஸஸ் வுயி ஊலாங் டீ, சீனா

கிரேக்க புராணக்கதையான நர்சிஸஸின் பெயரால் இந்த தேநீர் பெயரிடப்பட்டது. இது ஒரு அரிய ஓலாங் தேநீர் ஆகும். இது சீனாவின் புஜியான் மாகாணத்தின் வுயி மலைகளிலும் தைவானில் உள்ள பிங்லின் தேயிலை பகுதியிலும் வளர்க்கப்பட்டு அறுவடை செய்யப்படுகிறது.

மலர் மற்றும் பழ குறிப்புகளின் நுட்பமான குறிப்புடன் தேநீர் ஒரு உன்னதமான தாவர மற்றும் சாக்லேட் சுவையை உள்ளடக்கியது. இது ஒரு தீவிர நறுமணத்தைக் கொண்டுள்ளது. ஒரு கிலோவிற்கு சுமார் 5 இலட்ச ரூபாய் செலவாகும். இந்த தேநீர் நல்ல ஒயின் போன்ற வயதுடையது. ஈரப்பதத்தை உலர்த்துவதற்கும் அதன் சுவையை மேம்படுத்துவதற்கும் இரண்டு ஆண்டுகளுக்கு ஒருமுறை நெருப்பில் வாட்டப்படுகிறது.

9. காவ் ஷான் டீ, தைவான்

ஹை மவுண்டன் டீ என்றும் அழைக்கப்படும் கோவா ஷான் தேயிலை, தைவானின் உயரமான தேயிலை தோட்டங்களில் 1,000 மீட்டருக்கும் அதிகமான உயரத்தில் வளர்க்கப்படுகிறது.

அதிக ஈரப்பதம், உயரம், மெல்லிய காற்று மற்றும் விரிவான நொதித்தல் செயல்முறை ஆகியவை இந்த தேயிலையின் முழு-சுவை மற்றும் அதிக மணத்திதற்கு காரணமாகும். இந்த தேயிலை ஒரு கிலோவிற்கு 20,000 ரூபாய் வரை விற்கப்படுகிறது.

10. தியெஞ்சி மலர் தேநீர், சீனா

Tienchi மலர் தேநீர் சந்தையில் மிகவும் விலையுயர்ந்த தேயிலைகளில் ஒன்றாகும். அதன் குணப்படுத்தும் பண்புகள் மற்றும் தனித்துவமான சுவை காரணமாக இது விரும்பப்படுகிறது. சீனாவின் யுனான் மாகாணத்தில் மூன்று ஆண்டுகளுக்கு ஒருமுறை மட்டுமே வளரும் பனாக்ஸ் நோடோஜின்செங் பூக்களிலிருந்து இத்தேயிலை பயிரிடப்படுகிறது.

Tienchi மலர் தேநீர் காய்ச்சப்பட்ட பிறகு ஜின்ஸெங் போன்ற வாசனையுடன் இனிப்பு மற்றும் புதினா சுவையுடன் இருக்கும். அதன் வழக்கமான நுகர்வு தூக்கமின்மைக்கு உதவுகிறது, ஆக்ஸிஜன் அளவை அதிகரிக்கிறது. மற்றும் உடலில் இருந்து நச்சுகளை அகற்ற உதவுகிறது. இதன் விலை ஒரு கிலோவிற்கு சுமார் 13,000 ரூபாய் ஆகும்.

என்னடா பத்துக்கும் இருபதுக்கும் நாம் குடிக்கும் தேநீர் இங்கே மில்லியன் கணக்கிலும், ஆயிரக்கணக்கான ரூபாயிலும் விற்கிறது என்று யோசிக்கிறீர்களா? மேற்கண்ட தேயிலைகளின் உற்பத்தி மிகவும் குறைவு. மற்றும் அதன் தரம், பயன்கள் காரணமாக அவை அதிக விலை வைத்து விற்கப்படுகின்றன. நீங்கள் சாதாரண தேயிலையையோ இல்லை பசுமை தேயிலையையோ பால் கலக்காமல் குடித்தாலே தேநீரின் பயன் உங்களை வந்தடையும். கவலைப்படாதீர்கள், நம்முடைய தேநீரே மருத்துவ பலன் கொண்டதுதான்.

முக்கியச் செய்திகள் மற்றும் புதிய செய்திகளுக்கு NewsSense ஃபேஸ்புக் பக்கத்தை பின் தொடருங்கள்.

Google Newsஇல் NewsSense தளத்தை பின் தொடர இங்கே க்ளிக் செய்யுங்கள்.

Pls send your Valuable feedbacks to : feedback@newssensetn.com

Follow us on:

Newssensetn : https://www.facebook.com/FullyNewsy

Nalam 360 : https://www.facebook.com/Nalam360

Newsnow: https://www.facebook.com/GenZSense

TamilFlashnews: https://www.facebook.com/tamilflashnewsapp

Hangout : https://www.facebook.com/TamilWanderlust