இலங்கையில் அரசியல் நெருக்கடி உச்சக் கட்டத்தை எட்டியிருக்கிறது. மக்கள் போராட்டம் ஒருபுறம், கூட்டணியிலிருந்த கட்சிகள் வெளியேறியது மறுபுறம் என கோத்தபயா ராஜபக்‌ஷே அரசு சிக்கலில் தவிக்கிறது. அங்கு என்ன நடக்கிறது என்பதைப் பார்க்கலாம்.

• பரபரப்பான சூழலில் இலங்கை நாடாளுமன்றம் இன்று கூடியது.
  

• கோத்தபயா ராஜபக்‌ஷேவின் ‘ இலங்கை பொதுஜன பெரமுனா’ கட்சிக்குக் கொடுத்து வந்த ஆதரவை 11 கூட்டணிக் கட்சிகள் விலக்கிக் கொள்வதாக அறிவித்தன.
  

• இதனால் 41 நாடாளுமன்ற உறுப்பினர்களின் ஆதரவை ராஜபக்‌ஷே அரசு இழந்திருக்கிறது. 225 சீட்கள் கொண்ட இலங்கை நாடாளுமன்றத்தில், ஆட்சியமைக்கத் தேவையான மெஜாரிட்டி 113
  

• கூட்டணிக் கட்சிகள் ஆதரவை விலக்கிக் கொண்டதால், ராஜபக்‌ஷே அரசு மெஜாரிட்டியை இழக்கும் சூழ்நிலையில் இருக்கிறது.
  

• அதிபர் கோத்தபயா ராஜபக்‌ஷே, பதவியை ராஜினாமா செய்ய மாட்டேன் என்றும், எந்த கட்சிக்கு மெஜாரிட்டி இருக்கிறதோ அவர்கள் ஆட்சியமைக்கட்டும் என, கட்சியின் மூத்த நிர்வாகிகளிடம் தெரிவித்ததாகக் கூறப்படுகிறது.

• பிற்பகலில் அனைத்துக் கட்சிக் கூட்டம் நடைபெற்ற நிலையில், பெரும்பான்மைக்கான வாக்கெடுப்பு நடக்க வாய்ப்பிருப்பதாகக் கூறப்படுகிறது.

• மறுபுறம் எதிர்க்கட்சித் தலைவர் சஜித் பிரேமதாஸா, தேர்தல் ஒன்றே தீர்வு என வலியுறுத்தி வருகிறார்.

• நேற்று தற்காலிக நிதியமைச்சராகப் பதவியேற்ற அலி சேப்ரி, இன்று தனது பதவியை ராஜினாமா செய்தார்.

• தற்போது இலங்கை சந்தித்து வரும் சிக்கலை புதிய முறையில், சிறப்பான செயல்முறை கொண்டு சீர்படுத்த, சரியான நிதியமைச்சரை அதிபர் கோத்தபயா தேர்ந்தெடுக்க வேண்டும் எனத் தனது ராஜினாமா கடிதத்தில் சேப்ரி தெரிவித்திருக்கிறார்.

• சர்வதேச நாணய நிதியம் (IMF) இலங்கையின் அரசியல், பொருளாதார நிலைகளை உன்னிப்பாகக் கவனித்து வருவதாகத் தெரிவித்திருக்கிறது. பொருளாதார நெருக்கடியிலிருந்து தப்பிக்க, சர்வதேச நாணய நிதியத்தைக் கடைசி வாய்ப்பாக நம்பியிருக்கிறது இலங்கை!